كيفية عمل اعلان ممول علي الفيس بوك



طريقة عمل اعلان علي الفيس بوك .


نري كثير من الصور تظهر ارقام خرافية في الحملات الاعلانية علي الفيس بوك ، والكل يتسأل عن كيفية عمل حملة اعلانية علي الفيس بوك وتكون ناجحة وبصورة كبيرة ، سأحاول بقدر الامكان ان اتناول الشرح بطريقة مبسطه لعمل افضل الحملات الاعلانية علي الفيس بوك.

مثل هذه الصورة ، وهذه الصورة من احدي حملاتي الاعلانية في شهر يونيه لعام 2015




بدايتا لكي نتعلم طريقة عمل حملة اعلانية ناجحه علي الفيس بوك ، لابد من ان نتفهم جيداً طريقة عمل البرنامج الاعلاني للفيس بوك ، وهي التي تنقسم الي ثلاثة اقسام ، وهم "حملة اعلانية ، مجموعة اعلانية، اعلان" :







1-      حملة اعلانية campaign : وهنا انت فقط عليك تحديد الهدف من الحملة ، سواء كان زيارات للموقع ، او اعحاب بالصفحة، او ترويج للمنشور.


2-     مجموعة اعلانية Set  : وهنا انت تتحدد اولا  البلد التي انت هتستهدفها في اعلانك، ثم السن ثم النوع ، والي اخره من الشريحه المستهدفه الخاصة بيك، واهم خطوة في المجموعه الاعلانية هي الميزانية، وسعر المنافسة علي النقرة .

3-      الاعلان Ads  : وهنا انت فقط تختار المنشور او تضع الرابط والصورة الخاصة بالاعلان ، او اعجاب بالصفحة ، اي ان الاعلان هو اخر امر تفكر به اثناء عملك للحملة الاعلانية.

وعليك ان تعرف جيداُ انك بداخل الحملة الاعلانية الواحده تستطيع عمل اكتر من مجموعة اعلانية وكل مجموعة اعلانية ليها خصائصها وصفتها وبداخل المجموعة الاعلانية الواحده تستطيع عمل اكتر من اعلان ، ويفضل دائما انك تقوم بعمل اكثر من صورة واكثر من اعلان في المجموعة الاعلانية الواحده اقليا 3 صور وذلك لكي تعرف اي الاعلانات التي تتفاعل مع الجمهور.

- معظمنا يعلم ان هناك برنامجين مختلفين لعمل الاعلانات علي الفيس بوك الاول والاشهر والاكثر انتشاراُ هو Ads Manager والثاني والاقل استخدما ولكنه الاكثر احترافية وهو Power Editor  ،  ولكي تعمل حملة اعلانية ناجحة عليك استخدام الـ Power Editor  للامكانيات الكثيرة التي يوفرها لك اثناء إنشاء الحملة الاعلانية، وتستطيع الدخول علي البرنامج الاعلاني من خلال هذا الرابط.   https://www.facebook.com/ads/manage/powereditor/


اول خطوة واهمها انك بمجرد الدخل علي الباور ايدتور لابد وان تضغط علي رابط  Download to power editor وفي كل مرة تقوم بالدخول فيها الي البرنامج الاعلاني عليك تضغط علي نفس الرابط لكي تقوم بتحميل الحملات والتحديثات التي تمت في الحملات الاعلانية.




ثاني خطوة وهي انك سوف تضغط علي رابط Create Campaign ، وسوف تقوم بإختيار اسم خاص بك باسم الحملة ، عن نفسي مثلا عندما اقوم عمل حملة اقوم بتسميتها باسم الشركة  مثلا حملة عربي ادز شهر 12 ، حملة نمشي شهر 12 وهكذا ، ثم ستقوم بإختيار الهدف من الحلمة ، سواء زيارات للموقع وهذه افضلها في حالة العمل الـ CPA او في حالة انك تود زيادة الزيارات علي الموقع،  او إختيار ترويج للمنشور ، وبعدها ستقوم بالضغط علي كلمة Create .



ثالث خطوة ستضغط من الجانب الايسر علي كلمة Ad Set  ، ومنها ستختار Create Ad Set  ومن خلال CHOOSE A CAMPAIGN سوف تختار اسم الحملة التي تعمل عليها وتكتب اسم للمجموعة ويفضل ان الاسم يكون اسم العرض الذي تعمل عليه، مثلا عرض فوركس ماركتس 1 ، عرض فوركس ماركتس 2 ومن بعدها ستضغط علي كلمة Create  .




بعدها ستضهر لك الصورة القادمة والتي هي اهم عنصر في الحملات الاعلانية علي الفيس بوك




تبدء المجموعة الاعلانية بالميزانية التي ترغب الاستثمار بها،  ويمكنك ان تختار ان تكون الميزانية يومية او ميزانية المجموعة الاعلانية كاملة في مدة محددة، وبعدها سوف تختار المدة الزمنية للمجموعة الاعلانية.

- ثم ستقوم بإختيار البلد والاشخاص والسن وكافة التفاصيل التي ترغب في ظهور الاعلان اليها من خلال الـ Audience 






اهم نقاط هنا يجب مراعتها لكي تصل الي أرخص سعر في المجموعة الاعلانية ، يجب اختيار دولة واحدة في المجموعة الاعلانية، بمعني لو عندك عرض يشمل اكثر من دولة عليك ان تقوم بعمل مجموعة اعلانية مستقله لكل دولة بداخل الحملة الاعلانية الواحده، لان كل ما زاد عدد الدول في المجموعه الاعلانية الواحده  كل ما زاد عليك السعر النقرة، وكل ما تأخر الموافقه علي الاعلان.

في عروض الـ CPA  وخاصة عروض الالعاب وعروض الـ Pin Submit يفضل انك تختار سن صغير ، بالاضافة الي الاستغناء عن الاهتمامات حيث ان طبيعة هذه العروض تستدعي اكبر قدر ممكن من الزيارات ، لكن في عروض مثل  البيع والشراء او السيارات او السياحة او الفوركس ، يفضل اختيار المستهدفين بدقة من خلال Detailed Targeting ثم  Interests .


رابع خطوة : من خلال Placement ومن هنا عليك تحديد الاماكن التي تريد ان يظهر بها اعلانك ، سواء علي الصفحة الرئيسية للجولات او الكمبيوتر او علي الجانب الايمن او من خلال الانستجرام ، وهكذا .

خامس خطوة : وهي تحديد سعر النقرة التي ترغب ان تنافس بها وهي من خلال Optimization & Pricing وعند  كلمة Bid Amount سوف تختار كلمة Manual  وستقوم بتحديد سعر النقرة الذي تريد ان تنافس به ، مع التجربة ستعرف البلاد التي سعرها رخيص مثلا ب 0.01  والبلاد التي سعرها غالي مثلا ب 0.09 ,0.10  .


سادس خطوة : وهي الاعلان ذاته ، ومن المفترض ان تكون محدد اكتر من صورة شيقة وملفته للانتباه ، وعليك ان تنسي الالوان الفسفوريه في الصورة لان الفيس بوك اصبح يرفضها حاليا، سوف تعمل اكثر من اعلان داخل المجموعة الواحدة، صور مختلفة وصياغة كلامية مختلفة حتي تعرف اي من الاعلانات التي يتفاعل الجمهور معاها اكثر وعليك ان تعرف ان الفيس بوك عندما تعمل اكتر من اعلان داخل المجموعة الاعلانية الواحدة الفيس بوك سيقوم بعرض الاعلانات بالتساوي ، وبعد ذلك سيقوم بعرض الاعلانات التي تحصل علي نسبة مشاهدة ونقرات اعلي، فعليك ان تقوم بتوقيف الاعلانات التي ليس عليها تفاعل قوي وستترك التي عليها تفاعل اكثر ، وعليك ان تعرف ايضا كل ما تفاعل الجمهور اكثر مع اعلانك كل ما قل سعر النقرة التي تنافس بيها ، اي عليك ان تقوم بعمل صورة للاعلان جذابه بدرجة عاليه حتي تلاقي تفاعل اكثر مع الجمهور.

ومن هنا يمكنك ان تنشأ الاعلان





بعد ذلك ستظهر لك الصور التالية والتي من خلالها تستطيع انشاء الاعلانات ، الميزة هنا انك حين تقوم بإنشاء اعلان لزيادة الزيارات علي الموقع من خلال هذه الطريقة ان الاعلان لن يظهر علي الصفحة ولكن سيظهر فقط للاشخاص الذين انت قمت باستهدافهم من خلال المجموعة الاعلانية ، وهذه الطريقة جيده جدا في حالة الـ CPA حتي لا يستطيع احد ان يتتبع حملاتك حتي وان كان معجب بالصفحة .




عند الرقم (1) ستقوم بإختيار الصفحة  التي ستقوم بربط الاعلان بها ، عند الرقم ( 2 ) وهنا تقوم بإختيار ان يظهر اعلانك علي هيأة صورة واحدة او اكثر من صورة بحد اقصي 5 صور ، وعند الرقم ( 3 )  ستقوم بوضع الرابط الذي ترغب في التسويق اليه ، ومن ثم ستكمل البيانات المطلوبة من النص الذي ستكتبه حتي تقوم بتحفيذ الزوار بالنقر علي اعلانك ، وبعدها ستقوم بإختيار الصورة التي ترغب بوضعها علي الاعلان ومن ثم بعد ان تقوم بالانتهاء من الاعلان ستقوم بالنقر علي كلمة upload changes  ، بدون النقر علي كلمة upload changes لن يتم تفعيل الاعلان .

بهذا اكون قد انتهيت من الشرح ، اتنمي من الله ان اكون قمت بتبسيط الامور ، واذا كان لديك سؤال خاص بالاعلانات علي الفيس بوك ، الرجاء وضعه في التعليقات .

الـ CTR مش هو الدليل علي نجاح حملتك الاعلانية


الـ CTR مش هو الدليل علي نجاح حملتك الاعلانية


في الفترة الاخيرة بشوف ناس كتير من اللي شغاله في التسويق الالكتروني وخاصة في السوشيل ميديا Social Media  بنتزل صور كتير لحملات اعلانية علي الفيس بوك فيها نسبة الـ CTR  عالية واللي هي تعني (Click-through rate ) واللي معنها بالعربي نسبة النقر مقابل الظهور ، وبتتباهي انها بتوصل لنسبة CTR  عالية ممكن توصل مع ناس لنسبة 25 % ودي الحقيقة نسبة عاليه جداً والوصول ليها صعب شويا وليه اساليب كتير مختلفة.


ولكن حتي لو انت بتجيب نسبة الـ CTR  دي او اكتر منها وانت في النهاية مبتحققش ROI  عالي يبقي كدا انت رميت فلوس العميل علي الارض ، طب يعني ايه الكلام دا  ؟


تسويق الكتروني


نقول الاول ايه هو الـ ROI  وبعدين نكمل ، الـ ROI  هو اختصار لكلمة  "Return on investment " واللي هي معناها بالبلدي كدا ومن غير تعقيديات كتير (انت دفعت كام ورجعلك كام) .

طيب جميل ناخد مثال : انت دلوقت لو عامل حملة اعلانية ولو نفرض مثلا بقيمة 200 $ وبتروج بيها لمنتج بقيمة 20 $ وناس كتير جداً شافت الاعلان بتاعك واتفاعلت معاك علي الاعلان، بس اللي اشتري المنتج بتاعك دا من الاعلان دا هما 10 بس ، يبقي انت كدا عملت نسبة CTR  يتحاكي عنها التاريخ وصحابك علي الفيس بوك يفضلوا يصقفولك ويقولولك واو وعملتها ازاي دي والنبي قولنا علي الطريقة يا " تنين ".

لكن في النهاية نسبة ROI   عندك علي الاعلان دا بتساوي صفر كبير في الشهادة J والعميل دا مش هيشتغل معاك تاني، ليه بقي لان اللي اشتري منك هما 10 اشخاص بس و سعر المنتج 20$ يبقي انت كدا حَصيلت الدخل بتاعك هي الـ 200$ يبقي انت مكسبتش حاجه بالعكس كمان انت كدا خسرت الـ 200$ بتوع الحملة الاعلانية.


شايفك يا بتاع الـ inbound marketing   اللي بتقول انا كدا كسبت ان الناس عرفت بالمنتج بتاعي وسمعت وعملت branding  للمنتج وللشركة ، هرد عليك واقولك انت لو حابب تعمل branding للشركة و inbound marketing  يبقي في اعلان تاني غير اللي بتروج فيه للمنتج، تروح زي الشاطر وتعمل اعلان للبرندنج  وساعتها مش هقولك نسبة الـ ROI  كام لانها ساعتها مش بتتقاس بفلوس بتتقاس بسمعه ومدي وصولك للناس المهتمه بالمنتج بتاعك.


طيب يا عم فارس ايه اللي مفروض اعمله علشان اوصل لنسبة ROI  عاليه لما اعمل اعلان للمنتج بتاعي؟

حل الموضوع دا بسيط جدا وهو انك تحدد الشريحة المستهدفة باعلي دقه ، واهم حاجه تحددها في الشريحة المستهدفة دي هي مين صاحب قرار الشراء وتوجه الاعلان ليه، يعني ممكن انت تكون بتعمل اعلان لمنتج او خدمة المستهلك الرئيسي هم الرجال، بس صاحب قرار الشراء في المنتج دا هو النساء فخلي اعلانك يظهر بس للنساء، هتلاقي نسبة الـ CTR  بتاعتك منخفضة نوعا ما ولكن هتلاقي نسبة ROI  عالية وفي ارتفاع.


طيب نتكلم عن تجربة حصلت معايا في حملة اعلانية كنت بديرها في سنة 2010 علي الفيس بوك وطبعا وقتها مكنش في كل المعلومات اللي موجوده انهارده تقدر تستهدف بيها الناس او تعمل تحليل كافي عن مين صاحب قرار الشراء، وكانت الحملة المطلوب فيها الاتي:

المنتج : الترويج لعميات الضعف الجنسي وامراض الذكورة .
البلد المستهدفة : السعودية .
قيمة العملية : مبلغ كبير جدا كدا مش هينفع اقوله  J

طبعاً لما بدئنا الحملة الاعلانية حددنا الشريحة المستهدفة علي انها هتكون كالاتي:

الجنس : رجال
العمر: من 40 سنة الي 60 سنة ، -علي اساس ان دي الشريحة اللي احتمالية عندها ضعف جنسي- .
الميزانية اليومية  : ما يعادل قيمته 500 ريال يومياً.

وبدئنا الحملة الاعلانية ، وكانت النتائج مبهجة الصراحة بالنسبالي ، اول يوم كمية اتصال وحجز في الفورم كتير جداً ، ونسبة CTR  عالية جداً مع العلم ان الناس عارفة قيمة العملية.

ولكن بعد 3 يوم بدأ التفاعل يقل ، ومفيش ولا واحد عمل حجز للعملية  او حتي عمل كشف علي مدار الـ 3 ايام للحملة.

اقترحنا كالعادة اننا نزود الميزانية وزادت معانا لحد ما وصلت لقيمة 1500 ريال يومياً، وغيرت شويا في العمر الخاص بالشريحة ونزلت العمر لسن الـ 35 سنة وبعدها لـ 30 سنة، ولكن نفس المشكلة موجوده وهي ان نسبة الـ ROI  بالسالب J ونسبة الـ CTR  في ارتفاع  L.

وقفت الحملة بعد اسبوع منعاً لاستنذاف اموال اكتر من كدا، وبدأت ابحث ايه اللي ممكن يكون غلط، بعد تفكير عميق اللمبه نورت واستكشفت حاجة مهمة جداً وهي اننا كراجال عرب مبنحبش نعترف اننا عندنا عجز جنسي، لانه يعتبر اهانة للراجل انه يعترف انه عنده ضعف جنسي ، فأخدت قرار اني اعمل حملة اعلانية تانيه، بس المرادي هوجه الاعلان بتاعي للنساء ، لانها هي اللي هنا اللي صاحبة قرار الشراء وهي اللي هتأثر علي الراجل انه يروح يعمل العملية.

وبالفعل بدأت حملة جديدة بصيغة اعلانات متوجه للنساء ، من عمر 25 سنة الي عمر 45 سنة، بس صاحب الشركة علشان استنذف فلوس كتير في الحملة اللي قبلها ، فكان قراره بعد محاولات اقناع كتير اني اعمل حملة لمدة 3 ايام بقيمة 500 ريال بس J .

اشتغلت الحملة الاعلانية من هنا وملاقيش حد بيعبر الفورم ويملي فيها بيانته ، ونسبة الـ CTR  عندي تكاد تكون منعدمه ، بس لقيت صاحب الشركة بيكلمني وبيقولي انه هيزود المزانية لان حصل عنده 4 كشوفات وتم من خلالهم حجزين للعمليات من الحملة الاعلانية دي  J  اللي لسه شغاله بقالها يومين.

 - النساء في الحملة الاخيرة مكنتش بتتفاعل مع الاعلان وبتضغط عليه وبتملي فورم علشان طبعاً مظهرها قدام صحابتها واصدقائها والكلام دا ، بس كانت بتاخد رقم التليفون وتتصل وتاخد جوزها يروح يحجز ويعمل الكشف.

كل دا كان طبيعي بالنسبالي وفرحت كتير من نفسي لما عملت الحملة الاعلانية التانيه واخترت الشريحة المستهدفة صح، لكن اللي مكنش طبيعي بالنسبالي هي اني لما غيرت تغيير طفيف في الحلمة الاعلانية وخليت ان عمر النساء من 20 سنة بدل ما كان من 25 سنة نسبة الـ ROI  ارتفعت بشكل ملحوظ، وصعقت اكتر من نسبة الـ ROI  انها وصلت للضعف تقريبا لما نزلت بالعمر من 20 الي 19 سنة ، والقرار الاخير دا اخدته بناء عن مقاله كنت قريتها عن نسبة ارتفاع زواج صغيرات السن في السعودية من رجال كبيرة في السن .

الخلاصة : لما تعمل حملة اعلانية للترويج لمنتج حدد الشريحة المستهدفة بعانيه بناء علي مين صاحب قرار الشراء مش بس مين المهتم بالمنتج بتاعك ، وان الـ CTR العالي مش هو اهم عوامل نجاح الحملة الاعلانية.

بالنسبالي في سنة 2010 مكنش في ادوات كتير تساعدني اعرف بيها اكتر عن طبيعة الشريحة المستهدفه لكن دلوقت في ادوات كتير تقدر تحلل بيها الشريحة المستهدفة قبل ما تبدأ حملتك الاعلانية واهم الادوات دي هي Google Display Planner .


من خلالها هتقدر تحدد كل ما يتعلق بالشريحة بتاعتك من حيث العمر والنوع والاهتمامات كمان انواع الاجهزة اللي بيستخدمها لتصفح الانترنت وخلافة من كل الامور اللي تقدر تستفيد بيها.

#شير لو حاسس ان الموضوع ممكن يفيد غيرك.


حل مشكلة نسبة الكتابة 20% في اعلانات الفيس بوك


مشكلة الاعلان في الفيس بوك التي تتطلب نسبة كتابة علي الصورة 20% هل لها حل ؟

جميع من يعمل في التسويق الالكتروني قد قام بعمل اعلان علي الفيس بوك ، ولكن حين نقوم بعمل تصميم للاعلان نضع في اعتبارنا ان نسبة الكتابة علي الصورة لابد وان لا تتعدي نسبة الـ 20% من حجم الصورة، وهذه قاعدة قد قام الفيس بوك بوضعها علي المعلنين.

 والحقيقة الغرض منها هو ان لا تكون الصورة مشوه بكثرة الكتابة عليها، وإظهار المنتج، ولكننا احيانا كثرة نريد ان تكون النسبة اكثر من ذلك ولو بنسبة بسيطة، ونضطر كثيرا لتغيير التصميم لتفادي هذه المشكلة حتي لا يقوم الفيس بوك برفض الاعلان.

ولكن هل لهذه المشكلة حل ويمكننا نحن كمسوقين الكترونين ان نقوم بعمل اعلان علي الفيس بوك بنسبة كتابة اكثر من 20% علي حجم الصورة ؟

ولكي يتضح الامر اكثر هذه صورة لاعلان ادكاديمة رابطة المستقبل نسبة الكتابة عليه 72% ، ويمكننا قياس ذلك من خلال هذه الاداة : https://www.facebook.com/ads/tools/text_overlay





كما نري ان هذه الصورة بها نسبة كتابة بها 72 % ولو تم عمل الاعلان بها سيتم رفض الاعلان من قبل الفيس بوك، ولكن في الحقيقة كان هناك طريقتين لحل هذه المشلكة ولكن مؤخراً تم تعديل طريقة منهم من قبل الفيس بوك وبدء برفض الصور التي عليها اكثر من 20% كتابة والطريقتين هم:

1-     الطريقة الاولي : عمل موضوع عادي علي الصفحة status  وعمل له Boost Post هذه الطريقة احياناً تعمل واحيانا اخري ترفض من قبل الفيس بوك، وبالرغم من ان هذه الطريقة قد تم تعديلها من قبل الفيس بوك، الا انها كان بها عيوب وهي ان الميزانيات محددة سلفاً من الفيس بوك ويمكنك اختيار منها، بالاضافة الي عدم تحديد الفئية المستهدفه تحدياً، وكنا نستخدم هذه الخاصية لعمل branding للشركة التي نقوم بعمل اعلان لها.

2-     الطريقة الثانية:  وهي التي لم يتعرف عليا الفيس بوك حتي الان، وستستمر فترة حتي يتم تعديل برمجيات الاعلان في الفيس بوك وهنا يكمن السبب والسر.

واليك الان الخطوات :

-          كلنا نعرف جيداً ان اهم المقاسات التي يعمل بها الاعلان في الفيس بوك هو مقاس 1200 عرض × 628 ارتفاع ، وهذا المقاس المثالي للاعلانات، حيث انه يظهر علي الجانب الايسر من الفيس بوك بصورة جيدة ويظهر ايضاً علي الجوالات بصورة جيدة.

-          عليك الان تصميم اعلانك علي هذه المقاسات ووضع الكتابة بالطريقة التي تروق لك، وبالنسبة التي تروق لك ، ولكن نصيحتي لك هي ان لا تبالغ في الكتابة علي الصورة حتي لا تضيع ملامحها في الكتابة، وحتي تصل الي مبتغاك من الاعلان.

-          وبعد ذلك اذهب الي برنامج اعداد الصور وليكن الـ photoshop  وقم بعمل صفحة جديدة بمقاسات 1200 عرض × 4000 ارتفاع ، وقم بوضع التصميم الخاص بالاعلان في منتصف هذه الصفحة، مثل ما في هذه الصورة.



بهذه الطريقة اصبحت الصورة الان لدي الفيس بوك بهذا الحجم، والبرامجيات الخاصة بالاعلان سوف تقوم بقراءة نسبة الكتابة علي الصورة كلها وفي هذه المقاسات تحديداً ستكون كل مساحة اعلانك الاصلي بنسبة 20% من حجم الصورة ككل، ويمكنك الان كتابة نسبة 100% علي الاعلان الاصلي الخاص بك، شاهدة هذه الصورة 



يتبقي ملاحظتين يجب وضعهم في الاعتبار:

   -  الاولي وهي ان هذا الاعلان لا يصلح الإ حين عمل اعلان لموقع خارج الفيس بوك او عمل اعلان لزيادة الاعجاب بالصفحة، ولا يصلح لعمل تفاعل علي الصفحة ، وهذا النوع من الاعلانات ينفع كثيراً مواقع التجارة الالكترونية والبيع والمواقع التي تبحث عن الزيارت وايضاً لعروض الـ CPA  لمن يعمل بها ، فهي كما ذكرت تصلح  حين عمل اعلان لموقع خارجي .

-          الثانية تعديل الصورة من الداخل التي تظهر للجمهور المستهدف ، شاهد الصور القادمة :





وبعد تعديل الصورة في المنتصف مبارك عليك الاعلان وتمتع بنسبة كتابة اكثر من 20% ،وهذه الصور هي لاعلان تتعدي نسبة الكتابة عليه اكثر من 20% شاهد هذه الصور











الامر في منتهي البساطة، ولكننا نحن حين يتم وضع مشكله امامنا لا ننظر لكيفية حلها، ولكن نستسلم للامر المفروض علينا ولابد علينا وان نتقبله، نصحتي لك، حين تقع في مشكله اوجد الحل بنفسك، قبل ان تتقبل الوضع المفروض عليك .
هذه الطريقة اعمل بها بعد اسبوع تقريبا من تحديد نسبة الـ 20% من الفيس بوك، والان وجدت ان الافصاح عليها سيفيد الكثير .
هنيئاً لك الكتابة علي الاعلان بنسبة 100% ، ولا انتظر منك غير دعوة في ظهر الغيب.

شقق للبيع بالاسكندرية ، عميل خاص بالعقارات

جايلي شركة مقرها بالاسكندرية نشاطها بيع العقارات والاستثمار العقاري طالبة خدمة الـ SEO  ،
فطبيعي ببدأ بعمل بحث بأهم الكلمات البحثية اللي بيبقي عليها بحث كبير من العملاء المحتملين ومن اهم الكلمات اللي الناس بتبحث بيها في مجال العقارات هي كلمة "شقق للبيع بالاسكندرية"

شقق للبيع بالاسكندرية


عادةَ انا بستخدم الادوات دي:

الاول بستخدم الاداة دي : http://ubersuggest.org/  بعرف بيها الناس بتبحث بأيه

وبعدين بستخدم الاداة دي http://www.google.com/trends  ومنها بعرف ايه هي الكلمات اللي اخدة ترند عالي وايه الكلمات المحتمل انها تاخد بحث عالي الفترة الجايه

وبعدين بستخدم الاداه دي adwords.google.com/ko/KeywordPlanner علشان اعرف مدي المنافسة واحدد ترتيب الكلمات اللي هشتغل عليها

المهم وانا ببحث لقيت ان لما عملت بحث بكلمة "شقق للبيع بالاسكندرية"  طلع معايا في النتايج صفحتين فيس بوك وطالع في النتيجة التالتة الصفحة دي https://www.facebook.com/khaed.younes

وطالع في النتيجة الرابعه الصفحة دي https://www.facebook.com/ShoqqLlBe3FeAlexandria

معني كدا انك تقدر تطلع بصفحتك في محركات البحث بالكلمات المستهدفة مش لازم موقع ؟
ايون تقدر تطلع ودا اللي بنقول عليه SMO او Social media optimization

طيب بيتعمل دا ازي ؟ اقولك انا اولا في شوية حاجات اساسية كدا بتتعمل علي علشان تأهل صفحتك للصعود والظهور في جوجل لما حد يبحث عنك بالكلمة اللي محور تخصصك والحاحات دي منها :

اولا:  اسم الصفحة: و الصفحة الاولي دي اسمها "بيع وشراء شقق بالاسكندرية" والصفحة التانية اسمها "شقق للبيع فى الاسكندريه " واسم الصفحتين قريب جدا جدا من الكلمة البحثية اللي انا بحثت بيها، فبالتالي ظهروا في نتايج جوجل.

ثانياً: وصف الصفحة : او حول الصفحة ، حاول تخلي فيه كلمات من مجال العمل يعني هنا في المثال بتاعنا فيه كلمات خاصة بالعقارات في الصفحتين

ثالثاً: رابط الصفحة : ودا اللي تقدر تغيره وتعمل رابط لصفحتك من خلال اللينك دا https://www.facebook.com/username

في الصفحة الاولي الرابط مكنش ليه علاقة بمجال العقارات لكن هو اسم شخص وتقريبا هو صاحب الصفحة اما في الصفحة التانية صاحب الصفحة حاول يجيب اسم ليه علاقة بمجال العقارات لكن كتبة بطريقة يصعب علي جوجل فهمها ومفهمش منها غير كلمة اسكندرية.

رابعاً: عنوان الصفحة : والعنوان هنا المقصود بيه المكان اللي موجود فيه الشركة او المحل او اي شئ عنوان ارضي يعني، وهما في الصفحتين عملوا العنوان اسكندرية بس في الصفحة الاولي حط مع كلمة اسكندرية كلمات خاصة بالعقارات، هي بالنسبة للزائر مش لطيفة لكن هي عليها عامل في ظهور الصفحة في جوجل .

خامساً: talking about:  او يتحدث عن الخاص بالصفحة ، او بمعني اوضح التفاعل علي الصفحة كل ما كان التفاعل بتاع الصفحة عندك عالي، كل ما زود اهمية ظهور صفحتك في البحث.

سادساً: المحتوي الخاص بالصفحة: تخيل لما كل موضوع ينزل علي الصفحة فيه كلمة "شقق للبيع" او كلمة "شقة للبيع بالاسكندرية" او كلمة "شقة للبيع" كل الكلمات دي ليها علاقة ببعضها، وليها علاقة بمحتوي الصفحة ككل فبالتالي جوجل بيرشحها لان الصفحة محددة نوع الخدمة بتاعتها بدقه والشريحة كمان المستهدفة اللي هي الناس اللي بدور علي شقق للبيع في اسكندرية

سابعاً: bounce rate : او اللي ممكن نقول عليه معدل الارتداد ، يعني الناس اللي عملت بحث ودخلت علي صفحتك، قعدت مدة كبيرة تتصفح الصفحة يبقي انت كدا بتعمل معدل ارتداد قليل فدا كويس، والفيس والمواقع الاجتماعية بتساعدك في دا عموما، بس انت لو حاطط محتوي كويس الناس هتقعد اكتر وكل ما الناس قعدت اكتر جوا صفحتك انت المستفيد

دي تقريباً اهم حاجات تقدر تخلي صفحتك تنافس بيها اكبر المواقع اللي شغاله بقالها سنين علي كلمة زي كلمة "شقق للبيع بالاسكندرية" او اي مجال تاني .

شير يمكن غيرك يستفاد


جوميا مصر فتح محل ملابس في محطة الرمل !!


جوميا مصر فتح محل ملابس في محطة الرمل !! 



عارف ان العنوان غريب شويا بس الحقيقة انا انهارده حسيت ان جوميا فاشون مصر قلب علي اسلوب محلات محطة الرمل، طيب ايه العلاقة يا عم بين دا ودا ، خليني قبل ما اقولك ايه العلاقة اقولك المحلات في محطة الرمل اللي انا اقصدها بتعمل ايه ، في كام محل كدا في محطة الرمل وخاصة محلات الملابس الحريمي، بتبقي عارضه في البتاريين اطقم تلفت الانتباه وتعجبك لو انت معاك اختك او خطبيتك او المدام رايحين تشتروا من هناك ، فتدخل تسأل عن الطقم تقوم ترد عليك البنت اللي شغاله في المحل، والله يا فندم دا last pass واصلا فيها ديفوا، اتفضلوا في حاجات تانيه حلوه كتير جوا J

هنا الناس في الحالة دي بتنقسم ل 3 اقسام ، ناس ترد وتقول لاء شكرا ودي نسبتها بتترواح بين 20 الي 40 % وتاخد بعضها وتمشي ، وناس بتدخل تتفرج وهي محرجه ومش هتقتنع باي حاجه جوا المحل حتي لو في جوا فعلا حاجات احسن ، ودي تقريبا بتبقي نفس النسبة ، وناس بتدخل تتفرج وتشتري ودول اللي هما معدتش عنهم وقت يلفوا كتير ولازم يشتروا ودول برضه نقدر نقول نسبتهم بتترواح في نفس النسبة ، فالمحل دا كدا تقريبا خسر حوالي من 40 الي 80 % من الناس اللي عجبهم اصلا الطقم اللي معروض في الفاترينا طيب يا عم كل دا جميل ايه علاقة بقي جوميا فاشون مصر بمحلات محطة الرمل دي ؟  J


اقولك انا يا سيدي، من شويا كدا وانا بتصفح الفيس كالعادة لقيت اعلان ممول لصفحة جوميا فاشون مصر تحديداً الاعلان دا  "اضغط هنا

jumia.com.eg
jumia.com.eg


"واول نص الاعلان بيقول "استعد للشتاء واشتري دلوقتي كارديجان رجالي Ravin بأسعار تبدأ من 79 جنيه بس" اه صحيح احنا لسه في الصيف والاعلان عن كاردجن رجالي شتوي ماركة Ravin بس عشان انا بحب الماركة دي وعلشان عاجبني اصلا الكاردجن وعايز اجيب واحد ، ناهيك عن السعر الرخيص لانه موضه السنة اللي فاتت، بس عجبني وقولت ادخل اشتري الكاردجن واعمل اوردر ، المهم ضغط علي اللينك اللي فيه الاعلان اللي هو دا http://bit.ly/M_Outerwear_W37 

قوم يا سيدي الاعلان ياخدني علي صفحة _ودي بنقول عليها احنا كمسوقين صفحة الهبوط او landing page _ الصفحة اللي وداني عليها هي صفحة الجواكت الشتوي اه صحيح معظمها لماركة Ravin بس ملقتش الكاردجن اللي هو قال عليه ادخل اشتريه، وعلشان انا من الزباين والعملاء اللي هما بيقولوا لا شكرا مش داخل المحل ويمشي ، فانا قفلت الصفحة وقررت اني مش هشتري ، لا الكاردجن ولا حاجه تانيه، وعلشان كدا بقولك ان جوميا فاشون مصر قلبت علي محلات محطة الرمل J

jumia.com.eg
jumia.com.eg


بس علشان انا راجل بتاع تسويق مينفعش اقفل الصفحة كدا وامشي ساكت J فروحت اخدت الصور اللي انت شايفها دي وعملت الموضوع دا، انا مش عامله علشان تشهير و الحوارات دي لاء انا عملته علشان نحلل البوست دا ونطلع منه بدروس مستفاده ، طيب ما تيجي نحلل البوست سوا :


طيب علشان نحلل البوست دا عندنا احتمالين واللي هما :

الاحتمال الاول:

يمكن اللي عمل البوست دا حط لينك صفحة هبوط تانيه بالغلط ؟ 

لو الاحتمال دا صحيح يبقي في هنا مشكله في ادارة الصفحة، انه مش منظم شغله والدنيا عنده بطيخ ، ودا في حد ذاته مش حلو لبراند كبيرة زي جوميا، وممكن يكون سبب في فقدان عملاء كتير ، انا واحد منهم ، هترد وتقولي عميل واحد يغور في داهيه، لا حضرتك انا مش عميل واحد، انا عندي حساب علي الفيس عليه ناس كتير ممكن يتأثروا بكلامي لو فولت اني دخلت اشتري منتج معروض علي صفحة جوميا علي الفيس وملقتهوش معروض علي الموقع ، وعندي صفحتي علي الفيس عليها شوية معجبين برده ممكن فيهم نسبة تتأثر ، دا غير اني ليا صحابي اللي اصلا من هواة الشراء من علي المواقع اللي زي جوميا وخلافه ، فكل دا هيأثر بالسلب عليهم

الاحتمال التاني:

اللي عمل البوست دا كان قاصد فعلا يشد انتباهي للمنتج والسعر ويدخلني المحل عنده يمكن يعجبني حاجه تانيه واشتري.

طيب جميل بس احنا قولنا في المحلات الارضيه في احتمالية خسارة من 40 الي 80% لكن تعرف ان في النت احتمالية المكسب والشراء منعدمه في النوع دا من التسويق والعرض ؟؟ 

ازاي يا عم ، اقولك انا، الناس اللي بتشتري من علي النت حتي اللي بتشتري لمجرد الشرا ، لما تلاقي منتج عجبها وتدخل تشتريه ولما تضغط علي اللينك وتروح تلاقي معروض حاجه تانيه، هتحتاس وتوه جوا الصفحة وبعد ما تتفرج علي كل اللي موجود هتعمل حاجه من الاتنين يا اما هتقرر تأجل قرار الشراء، يا اما هتقفل الصفحة وترجع تاني تتصفح الفيس زي ما كانت ، لانه مش مضطر انه يشتري علشان يرجع بيته والوقت سرح منه من كتر ما بيلف علي المحلات، لاء هو لقاك ناططله علي الفيس عجبه المنتج دخل يشتريه ملقهوش، فعادي جدا انه مشتريش لانه مش مضطر للشرا، دا غير اصلا انه ممكن يروح علي منافس ليك، ويدور علي المنتج اللي عجبه عندك وملقهوش، ويشتريه من هناك يبقي انت بوظت الدنيا .

ففي الحالتين الاعلان دا مش هيجيب الهدف منه وهو انه يبيع المنتج دا، او اي منتج تاني من خلال الاعلان دا، ودا الدرس المستفاد من الاعلان والموضوع الطويل الممل دا، لما تقرر انك تبيع علي السوشيل ميديا اللي هي اصلا مش للبيع، لازم تكون صريح وواضح جدااااااا لاقصي درجه ، فكان المفروض اني لما اضغط علي اللينك الاقي الكاردجن اللي عاجبني واعمل الادوردر وانتهي الموضوع ، لكن كدا انت دخلتني في دوامه واحتمالية اني يمكن تعجبني حاجه من اللي جوا، لكن الحقيقة لا انا ولا غيري مجبرين او مطضرين اننا نشتري.


انا كدا خلصت يارب بس اكون اقدرت اوصلكم المعلومه بصورة بسيطه، ولو حد عنده رأي تاني احب اسمعه وكلنا بنتعلم من بعض 






الحقوق محفوظه فارس سنيور           تعريب مدونة البلوقر