‏إظهار الرسائل ذات التسميات مقالات. إظهار كافة الرسائل

جوميا مصر فتح محل ملابس في محطة الرمل !!


جوميا مصر فتح محل ملابس في محطة الرمل !! 



عارف ان العنوان غريب شويا بس الحقيقة انا انهارده حسيت ان جوميا فاشون مصر قلب علي اسلوب محلات محطة الرمل، طيب ايه العلاقة يا عم بين دا ودا ، خليني قبل ما اقولك ايه العلاقة اقولك المحلات في محطة الرمل اللي انا اقصدها بتعمل ايه ، في كام محل كدا في محطة الرمل وخاصة محلات الملابس الحريمي، بتبقي عارضه في البتاريين اطقم تلفت الانتباه وتعجبك لو انت معاك اختك او خطبيتك او المدام رايحين تشتروا من هناك ، فتدخل تسأل عن الطقم تقوم ترد عليك البنت اللي شغاله في المحل، والله يا فندم دا last pass واصلا فيها ديفوا، اتفضلوا في حاجات تانيه حلوه كتير جوا J

هنا الناس في الحالة دي بتنقسم ل 3 اقسام ، ناس ترد وتقول لاء شكرا ودي نسبتها بتترواح بين 20 الي 40 % وتاخد بعضها وتمشي ، وناس بتدخل تتفرج وهي محرجه ومش هتقتنع باي حاجه جوا المحل حتي لو في جوا فعلا حاجات احسن ، ودي تقريبا بتبقي نفس النسبة ، وناس بتدخل تتفرج وتشتري ودول اللي هما معدتش عنهم وقت يلفوا كتير ولازم يشتروا ودول برضه نقدر نقول نسبتهم بتترواح في نفس النسبة ، فالمحل دا كدا تقريبا خسر حوالي من 40 الي 80 % من الناس اللي عجبهم اصلا الطقم اللي معروض في الفاترينا طيب يا عم كل دا جميل ايه علاقة بقي جوميا فاشون مصر بمحلات محطة الرمل دي ؟  J


اقولك انا يا سيدي، من شويا كدا وانا بتصفح الفيس كالعادة لقيت اعلان ممول لصفحة جوميا فاشون مصر تحديداً الاعلان دا  "اضغط هنا

jumia.com.eg
jumia.com.eg


"واول نص الاعلان بيقول "استعد للشتاء واشتري دلوقتي كارديجان رجالي Ravin بأسعار تبدأ من 79 جنيه بس" اه صحيح احنا لسه في الصيف والاعلان عن كاردجن رجالي شتوي ماركة Ravin بس عشان انا بحب الماركة دي وعلشان عاجبني اصلا الكاردجن وعايز اجيب واحد ، ناهيك عن السعر الرخيص لانه موضه السنة اللي فاتت، بس عجبني وقولت ادخل اشتري الكاردجن واعمل اوردر ، المهم ضغط علي اللينك اللي فيه الاعلان اللي هو دا http://bit.ly/M_Outerwear_W37 

قوم يا سيدي الاعلان ياخدني علي صفحة _ودي بنقول عليها احنا كمسوقين صفحة الهبوط او landing page _ الصفحة اللي وداني عليها هي صفحة الجواكت الشتوي اه صحيح معظمها لماركة Ravin بس ملقتش الكاردجن اللي هو قال عليه ادخل اشتريه، وعلشان انا من الزباين والعملاء اللي هما بيقولوا لا شكرا مش داخل المحل ويمشي ، فانا قفلت الصفحة وقررت اني مش هشتري ، لا الكاردجن ولا حاجه تانيه، وعلشان كدا بقولك ان جوميا فاشون مصر قلبت علي محلات محطة الرمل J

jumia.com.eg
jumia.com.eg


بس علشان انا راجل بتاع تسويق مينفعش اقفل الصفحة كدا وامشي ساكت J فروحت اخدت الصور اللي انت شايفها دي وعملت الموضوع دا، انا مش عامله علشان تشهير و الحوارات دي لاء انا عملته علشان نحلل البوست دا ونطلع منه بدروس مستفاده ، طيب ما تيجي نحلل البوست سوا :


طيب علشان نحلل البوست دا عندنا احتمالين واللي هما :

الاحتمال الاول:

يمكن اللي عمل البوست دا حط لينك صفحة هبوط تانيه بالغلط ؟ 

لو الاحتمال دا صحيح يبقي في هنا مشكله في ادارة الصفحة، انه مش منظم شغله والدنيا عنده بطيخ ، ودا في حد ذاته مش حلو لبراند كبيرة زي جوميا، وممكن يكون سبب في فقدان عملاء كتير ، انا واحد منهم ، هترد وتقولي عميل واحد يغور في داهيه، لا حضرتك انا مش عميل واحد، انا عندي حساب علي الفيس عليه ناس كتير ممكن يتأثروا بكلامي لو فولت اني دخلت اشتري منتج معروض علي صفحة جوميا علي الفيس وملقتهوش معروض علي الموقع ، وعندي صفحتي علي الفيس عليها شوية معجبين برده ممكن فيهم نسبة تتأثر ، دا غير اني ليا صحابي اللي اصلا من هواة الشراء من علي المواقع اللي زي جوميا وخلافه ، فكل دا هيأثر بالسلب عليهم

الاحتمال التاني:

اللي عمل البوست دا كان قاصد فعلا يشد انتباهي للمنتج والسعر ويدخلني المحل عنده يمكن يعجبني حاجه تانيه واشتري.

طيب جميل بس احنا قولنا في المحلات الارضيه في احتمالية خسارة من 40 الي 80% لكن تعرف ان في النت احتمالية المكسب والشراء منعدمه في النوع دا من التسويق والعرض ؟؟ 

ازاي يا عم ، اقولك انا، الناس اللي بتشتري من علي النت حتي اللي بتشتري لمجرد الشرا ، لما تلاقي منتج عجبها وتدخل تشتريه ولما تضغط علي اللينك وتروح تلاقي معروض حاجه تانيه، هتحتاس وتوه جوا الصفحة وبعد ما تتفرج علي كل اللي موجود هتعمل حاجه من الاتنين يا اما هتقرر تأجل قرار الشراء، يا اما هتقفل الصفحة وترجع تاني تتصفح الفيس زي ما كانت ، لانه مش مضطر انه يشتري علشان يرجع بيته والوقت سرح منه من كتر ما بيلف علي المحلات، لاء هو لقاك ناططله علي الفيس عجبه المنتج دخل يشتريه ملقهوش، فعادي جدا انه مشتريش لانه مش مضطر للشرا، دا غير اصلا انه ممكن يروح علي منافس ليك، ويدور علي المنتج اللي عجبه عندك وملقهوش، ويشتريه من هناك يبقي انت بوظت الدنيا .

ففي الحالتين الاعلان دا مش هيجيب الهدف منه وهو انه يبيع المنتج دا، او اي منتج تاني من خلال الاعلان دا، ودا الدرس المستفاد من الاعلان والموضوع الطويل الممل دا، لما تقرر انك تبيع علي السوشيل ميديا اللي هي اصلا مش للبيع، لازم تكون صريح وواضح جدااااااا لاقصي درجه ، فكان المفروض اني لما اضغط علي اللينك الاقي الكاردجن اللي عاجبني واعمل الادوردر وانتهي الموضوع ، لكن كدا انت دخلتني في دوامه واحتمالية اني يمكن تعجبني حاجه من اللي جوا، لكن الحقيقة لا انا ولا غيري مجبرين او مطضرين اننا نشتري.


انا كدا خلصت يارب بس اكون اقدرت اوصلكم المعلومه بصورة بسيطه، ولو حد عنده رأي تاني احب اسمعه وكلنا بنتعلم من بعض 






تحقيق اول خطة تسويقية خاصة بيا


ازيكم يارب تكونوا بخير ويوم سعيد عليكم كلكم 

عايز اوضح حاجه صغيره في الاول، الصفحة ,والمدونة دول حاجه شخصية يعني باسم شخص و مجال شغلي هو التسويق الالكتروني والـ SEO 

البوست دا شخصي وطويل شويا، بس اقراه للاخر يمكن يفيدك ويغيير حياتك فعلا.

انا بدأت شغلي الفعلي في التسويق الالكتروني في سنة 2010 ، وكان كل اول سنة اكتب في ملف txt اهداف عايز احققها علي نهاية السنة وكنت في الاغلب مبحققش معظامها.

والدنيا كانت ماشيه وتمام، بس كنت بلاقي معاناه كبيرة في اني اشرح شغلي للمجتمع اللي انا عايش فيه، لان شغلي مع شركات سعودية من خلال الانترنت فانا لا بروح مكتب الصبح ولا برجع اخر النهار من شغل، وكنت كتبت مقال في مدونتي في شهر  2/2012 بعنوان "هل انت عاطل يعمل ام عاطل لا يعمل"

فارس سنيور


المهم من كتر الضغط النفسي قررت بعد سنتين كاملين من شغلي اني اعمل مشروع خاص بيا وكنت عايز اعمل شركة في مجال شغلي وفي التدريب علي التسويق الالكتروني وكل مجالات الـ IT ولما عملت وقتها Analysis  للسوق السكندري لقيت ان المشروع مش هيبقي مجدي في العائد بتاعه، لاننا كنا لسه في هوجة الثورة والدنيا مكنتش تمام كنا وقتها في اول شهر 2/2012

المهم غيرت الفكرة ،و بدأت اجهز لعمل محل ملابس من شهر 10/2012 ،وفتحت المحل 5/2013 ودي كانت اكبر غلطه في حياتي،اني اعمل حاجه بعيده عن شغلي اللي بحبه هو اي نعم بمقايس النجاح المشروع نجح، واستخدمت فيه كل اساليب التسويق،لكن انا ملقتش نفسي فيه وحصل شوية مشاكل مع شركاء في المحل، وانتهي الامر بينا اني قررت اني هصفي المحل واقفله، وهخسر في الموضوع دا كل فلوسي اللي دفعتها اللي هما تعب وشغل 3 سنين، بالاضافة الي شوية ديون كدا يقدروا بملبغ 53 الف جنيه مصري.

ودا كان مقابل اني اشتري نفسي وارجع تاني لنفسي وشغلي اللي بحبه وبفهمه، وبالفعل قفلت المحل في شهر 3/2014 ولما رجعت بصيت حوليا لقيت الناس اللي كانت اقل مني بمراحل في السوق، بقت هي اللي متحكمه في المجال في السوق، لاني بحكم التشتيت مكنتش قادر اوفق بين المحل وشغلي دا غير ان مجالنا كل يوم فيه جديد وبطبيعة الوضع اللي كنت فيه مكنتش قادر اتابع.

قعدت في الدوامه دي شهر، واستعوضت ربنا في تعبي في الـ 3 سنين، وعلشان اسدد الديون ملقتش قدامي حل غير اني اسافر السعودية اشتغل من هناك، وبالفعل اتفقت مع مجموعة علاج الطبية، ومضيت عقد من شركة معامل المختبر السعودية، هما تبع بعض اصلا .

ويوم 20/4/2014 كنت بستلم البسبور بتاعي بالمهنه اللي انا طالع عليها، واول ما وصلت البيت ولسه بقول اني هناملي ساعتين، جالي تليفون ان اخويا سمير سنيور الكبير اتوفي، هو كان شغال دكتور في كلية العلوم جامعة اسكندرية بس كان مسافر السعودية في جامعة الملك عبد العزيز، المهم انا الخبر نزل عليا زي الصاعقة، كان لسه معايا من اسبوعين بالظبط، المهم عدت عليا فترة دخلت في شهرين عندي حالة من الخوف من المستقبل غير طبيعية.

لغيت سفري لانه مكنيش ينفع نفسيا عليا او علي اهلي اني اسبهم انا كمان وامشي وخاصة ان اخويا التاني محمود سنيور ظابط بحري، وبيقعد في البحر اكتر ما بنشوفه؛ المهم قعدت اقول مع نفسي ان 2013 و 2014 دول اسوء سنتين عدو عليا

 خسرت فيهم جزء كبير اوي من شغلي واهملت فيه
خسرت فلوسي وبقيت مديون
خسرت الانسانه اللي كان حلمي اني اتجوزها L
خسرت 30 سنة من عمري معملتش فيهم اي حاجه
اخويا الكبير معدتش هشوفه تاني
 هو باقي ايه تاني اخسره  ؟ ؟

واللي ذودها اني فتحت حسابي في البنك وبصيت عليه وحسبت كل الفلوس اللي دخلتلي من شغلي علي مدار الـ 4 سنين، لقيت ان 67 % بس من الفلوس دي كانت تجبلي شقة في جليم J وتجوزني احلي جوازه مرتاحه 

لكن الحقيقه وقتها انا كنت رجعت لتحت الصفر وكان لازم عليا اني ابدأ من جديد والمرادي من تحت الصفر مش من الصفر.

المهم في اول شهر 6 اللي فات وانا قاعد بعمل خطة تسويقية لشركة صغيرة في السعودية،وكانت الخطة دي مطلوب انها تكون في مدة 3 شهور، وكان هدف قدمنا اننا نعملها نقلة كبيرة وتنافس 2 من اكبر شركات السعودية في مجالها، وانا شغال علي الخطة كدا خطر في بالي اني بعمل خطط للناس وللشركات وبنقل شركات من تحت السلم لشركات كبيرة ومعروفه.

وسألت نفسي سؤال هو انا ليه ولا مره عملت لنفسي خطة تسويقية  J J

وقعدت مع نفسي وعملت عليا SOWT Analysis  وعملت SMART target لنفسي وقسمتهم لجزئين جزء في شغلي وجزء في حياتي الشخصية، وعملت لنفسي لاول مره خطة كاملة مش مجرد اهداف بحطها كل اول سنة، ونزلت بوست علي الاكونت الشخصي بتاعي وقولت اني في 1/9 اللي جاي هحقق مجموعة من الاهداف وطلبت من الناس اللي عندي وقتها انهم يجوا ويحسابوني في اول شهر 9  ومحدش يرحمني لو كنت مقصر وكانت بنتحصر الاهداف في :

- كان عندي حلم قديم اني انزل ارض الواقع وابعد شويا عن عيشة الانترنت وادرب تسويق الكتروني.
- اني ابطل سجاير بعد ما وصل معدلي اليومي تقريبا اكتر من 60 سجارة في اليوم .
- اشتغل في شركة كبيرة في مصر في مجال شغلي مع الاحتفاظ بشغلي في شركة بكسل العربية ، اللي بعتبرها جزء مني مش مجرد شركة شغال فيها.
- انا ضعيف شويتين في الانجليزي ودا بسببلي عطلة كبيرة في شغلي، عايز اقوي نفسي فيه.
- اسدد جزء كبير من الديون اللي عليا وكنت محدد اني اسدد 50% منهم.
وفوق دا كله وكان اهم هدف بالنسبالي اني اخد خطوة جدية في موضوع الارتباط والاستقرار النفسي فيه.

وانا انهارده 1/9/2014 : وقبل ما حد يجي ويحاسبني انا الحمد الله وصلت لاكتر من 90% من اهدافي

- انا حاليا بدرب فعليا تسويق الكتروني، قريب اوي في القاهرة كمان.
- بالنسبة للسجاير انا اخدت قرار اني هبطل من 16 يوم بالظبط، شربت فيهم 24 سجارة ، بعد ما كان في اليوم الواحد اكتر من 60 سجارة.
- بالنسبة لشغلي في شركة مصرية كبيرة، عندي مقابله يوم الاربع الجاي في مجلة لغة العصر ، التابعه لجريدة الاهرام، وفي موافقه مبدئية علي قبولي في الشغل.
- بالنسبة للانجليزي، بالفعل بدأت في كورس انجليزي من رمضان وفرق معايا كتير جداً
- بالنسبة للديون خلاص الحمد الله مبقاش عليا غير مبلغ بسيط ربنا يكرم وان شاء الله يتسدد في نهاية شهر 10 

- بخصوص بقي الارتباط ، انا حاليا بالفعل خلاص تقريبا خطبت فاضل بس الرسميات والشكل الاجتماعي، ودا هيتم قريب اوي برضه، وحاسس فعلا ان ربنا عوضني بيها عن كل اللي فات J

في ظل الـ 3 شهور دول قابنلي عقبات كتير اوي، يعني مثلا جهازي باظ واشتريت جهازي جديد، ومكنش معايا وقتها تمنه بس ربنا كرم ومعظم الداتا اللي علي جهازي طارت، من اهمهم محتوي كورس التسويق ، دا غير ان جهازي الجديد اصلا هو كمان حاليا في التوكيل بيتصلح L L


معرض في اي وقت حاليا اني يتصفالي من شركة بكسل، بسبب مشكله كبيرة في الموقع حالياً، وعدم وجود عملاء للشركة، بس ربك كريم وشغال علي خطة جديدة.

معلش طولت عليكم ، بس اللي انا عايز اقولهولكم، مفيش حاجه اسمها صعب، مفيش حاجه اسمها مستحيل مفيش حاجه اسمها حلم

في حاجة اسمها معافرة، في حاجه اسمها شقلبه في الدنيا ، في حاجه اسمها اهداف محددة بوقت مطلوب منك تحققها.

مش مطالب مني اني احكيلك الكلام دا ولا انت مطالب منك انك توصل للسطر دا، بس حبيت اقول الكلام دا يمكن فعليا تغيير نظرك للحياة وتعرف انت عايز ايه و صدقني الدنيا اسهل بكتير من مما نتخيل، بس المهم تعرف كويس انت عايز ايه وتعرف انت هتوصله في قد ايه وهتوصله ازاي .

حاجة كمان مهمه اوي عايز اقولهالك، اوعي تعمل حاجه علشان ترضي الناس، او تغيير من نفسك علشان حد، اعمل كل حاجه علشان نفسك انت، مش أنانية ولا حب للذات، بس نفسك تستاهل انك تعمل علشنها اكتر من ما بتعمل علشان حد في حياتك، لانك مع اول دروب في حياتك، هينكر كل اللي عملته علشانه وهتلاقي نفسك فعلا معملتش حاجه لا لنفسك ولا عشانه.


شكرا ليكم ، واعتقد كدا انا جاوبت علي سؤال اتسألته كتير هي الصورة اللي في كافر الصفحة دي معناها ايه ولو في حد لسه مفهمش معني الصورة يبقي العيب عنده 



البطالة اسلوب تفكير

البطالة اسلوب تفكير


#البطالة_اسلوب_تفكير  

طبعا كلنا عارفين ان البطالة مشكلة عالمية، و نسبة البطالة في مصر عالية حبتين، ودا راجع الي ان الشباب بتخلص جامعه لا يفقهوا شئ في الحياة العملية، ويروحوا يدورو علي النت علي template  للـ cv  وميبقاش عارفين هيكتبوا فيه ايه وايه الخبرات اللي هيحطوها في الـ CV  ، وطبعا ً انا لو جيت وقولتلك ان فعليا مفيش حاجه اسمها بطالة وان البطالة دي اسلوب تفكير عندك وعند اهلك ولازم يتغيير طبعا هتقول عليا عبيط او مجنون J.

 وماله يا عم مفيش مشاكل بس فعلا مفيش حاجة اسمها بطالة وانت اللي لازم تغيير طريقة تفكيرك الشغل مش بس انك تروح تقعد علي مكتب وتقبض راتب اخر الشهر .

المشكله كلها بتنحصر في اننا بنتربي علي انه بعد ما نخلص الكليه هنروح نشتغل في شركة وهنروح الصبح الشركة واخر النهار نرجع من الشركة، وهنقبض راتب ميكفيش انه يعيش اسرة مكونة من فردين، ودا راجع لفكرة اننا بندور علي الامان الوظيفي ومنخاطرش ونغامر.

 طيب انت تعرف ان اكبر مخاطره في حياتك هي انك متخاطرش اصلا وتعيش تقليدي ؟

البطالة في مصر
البطالة في مصر


طيب انت تسمع عن حاجه اسمها freelancer الفري لانسر دول بيشتغلوا شغل حر والمتعارف عليه، ان الشغل دا معظمه بيبقي في مجال الـ IT  والانترنت ، طيب انت تعرف ان كان في احصائية في 2013 بتقول ان اللي شغال في الفري لانسر ما بين 32 الي 60 مليون بني ادم !!!!

طيب انت تعرف ان الناس دي معظم شغلهم بيبقي بالساعه مش باليوم ولا بالشهر وتعرف كمان انهم بيقبضوا بالدولار وتقريبا دخلهم الشهري بيعدي مدير الشركة اللي اهلينا فضلوا يحلموا انهم يشغلونا فيها ؟

طيب  انا بقول كل دا ليه ، انا بقول الكلام دا علشان تعرف وتتاكد ان البطالة اسلوب تفكير وانك لازم تتحرك وتتعلم وانت حتي لسه بتدرس في الجامعه واعتقد ان 70 % مننا ويمكن اكتر مدخلش الكليه اللي هو حاببها،  واعتقد برضه اننا مكناش نعرف احنا عايزين ندخل الكليه دي بعينها ليه ؟

ما علينا من الكلام دا كله خد المهم ، انت ممكن تشتغل ايه فري لانسر ويدخلك دخل حلو ، بص يا سيدي انت ممكن تشغل حاجه من الحاجات دي :

-         ممكن تتعلم برمجة ودي قناة لحد كويس اوي بيعلم برمجة ببلاش وبالعربي مش محتاج يعني يكون معاك لغة https://www.youtube.com/user/abdullaheidtv/
-         وممكن تتعلم تصميم مواقع ودا كورس بيعلمك تصميم مواقع
-         وبرضه ممكن تتعلم جرافيك ممكن تاخدلك جوله هنا في الينك دا ومفيش مانع تلفلك لفه في الموقع http://www.mega-course.com/search/label/Photoshop
-         وممكن تتعلم تسويق الكتروني، انا بعمل كورس مجاني ليه تابعني وهتتعلم ان شاء الله
-         في التسويق الالكتروني مجالات كتير ممكن تتخصص في حاجه واحده منهم ممكن تتخصص في مجال السيو seo  ودا تخصصي اصلا
-         وممكن تتخص في ادارة social media  وانك تعمل حملات اعلانية علي الفيس ، ودا هتتعلمه معايا ان شاء الله مجانا برده.
-         وممكن تشتغل في مجال الـ affiliate  ودا جزء من التسويق الالكتروني ومربح جدا لو اتعلمته صح ودي قناة لواحد بيشرح كورس cpa  .
-         انت تعرف انك ممكن حتي تعمل بحث في جوجل عن كيفية زيادة متابعين لتويتر ومعجبين للفيس بوك والحته الصغيره اوي دي تتدخلك دخل محترم "مع تحفظي علي النقطة دي"
-         انت تعرف انك لو عندك موهبه في اعداد الفيديوهات ممكن تعمل قناه علي اليوتيوب وتدخل شريك مع جوجل من خلال youtube partners وتقدر تعرف عن المجال دا من هنا
المهم تحدد انت عايز تتعلم ايه ، واي كورس من دول مش هياخد منك تعليم اكتر من شهر لو بتتعلمه علي مراحل متقطعه، حدد انت عايز تتعلم ايه واتعلمه وبعد ما تتعلم جرب كتير واغلط مش هتتعلم غير من اخطائك وكل ما هتغلط اكتر خبرتك بتزيد اكتر وبتتعلم اكتر

نيجي للنقطة اللي بعد كدا انا اتعلمت وبقيت بعمل شغل حلو، هبيع شغلي فين ؟

بص يا سدي دي مجموعة مواقع للفري لانسر منها العربي ومنها الاجنبي ادخل خدلك جوله فيهم كدا وشوف الاسعار وشوف الناس بتعمل دخل شهري كام من حاجات بسيطة


عرفت بقي ان البطالة اسلوب تفكير ، غير اسلوب تفكيرك وسيبك من اللي حواليك  واللي هيكسر فيك دول مفيش اكتر منهم خد قرارك وابدا دلوقت ومتاجلش لبكره
صباحك ورد وفل ، صباحك تعليم واجتهاد وافتكر كويس ان  #البطالة_اسلوب_تفكير 

هل انت عاطل يعمل ام عاطل لا تعمل؟


في ظل الظروف الراهنة التي تمر بها جميع البلاد العربية منذ فترة طويلة، وبعد ان احتل الانترنت مكانة كبيرة في منازلنا جميعاً تكاد تكون قضت علي مشاهدة ومتابعة التليفزيون، ما عدا شهر رمضان في مصر.

ولان الشباب العربي وخاصة المصري، للاسف يبحث دائما بعد تخرجه من الجامعة علي الوظيفة المناسبة لطموحاته في سوق العمل ولان سوق العمل الان اصبح لا يعترف بشهادة الجامعة فقط، فقد اتجه معظم الشباب العربي الي البحث عن دورات متخلفتة في عالم التقنيات والوب علي اساس انه سوق العمل الرائج حاليا، وقد ترك الكثير منهم غرف الشات في الياهو، والكف عن إضافة "المغربيات" علي ماسنجر الهوت ميل.

فمنهم من توجه الي دراسة دوارت في تصميم المواقع ومنهم من توجه الي البرمجة ، ومنهم من اهتم بالتسويق الالكتروني، علي اعتقاد انه الدجاجة التي تأتي له كل يوم بالبضية الذهب.

ولكن للاسف يصتدم الشاب بعد الانتهاء من الدورات التدريبة -ذات العناوين الرنانه بالحصول علي الوظيفة اثناء التدريب- بارض الواقع حيث انه لا يجد شركة تقوم بتوظيفه لانه عديم الخبرة.

 ويأتي هنا الانقسام الي قسمين:

الحقوق محفوظه فارس سنيور           تعريب مدونة البلوقر