اعلان علي جوجل ادوردز
من كام يوم كدا نزلت صورة الاعلان دا علي الصفحة ،وقولت
عايز راي الناس فيه وسالت كام سؤال
دلوقت انا حابب احلل الاعلان معاكم وهل الاعلان دا حقق
الاستهداف منه ولا لاء
اولا: لازم نعرف ايه هي اهم المواصفات اللي بتبقي في
الاعلان الناجح واللي هي :
-
من اهم الحاجات اللي بتبقي في الاعلان الناجح هو وجود صورة
شخص في الاعلان، ومعمول علي وشه zoom
، ودا موجود فعليا في الاعلان دا وهي صورة
البنت اللي لابسه خوذه، وهو هنا في الاعلان دا اتعمد ان يكون الاضاءة في الجزء
باهته ودا علشان يلفت انتباهك اكتر علي الجزء اللي تحت.
-
تاني حاجه في الاعلان لازم تكون موجوده هو وجود لون مميز
ويفضل يكون لون فاقع، علشان يلفت انتباه العين، ودا برضه موجود في الاعلان وهو
اللون اللي تحت وزي ما قولت هو اتعمد يبهت الصورة فوق، ويزهي الصورة تحت ، علشان
يسحب عينك بصورة لا إرادية منك علي الجزء دا .
-
تالت حاجه المفروض تكون موجوده في الاعلان، هي وجود
الانتماء ، بكلمة او بصورة ، والانتماء يا اما بلدك،
يا اما دينك، واحياناً بيدخل معاهم الفكر السياسي ، ودا برضه موجود في الاعلان
بكلمة "هذا ما تؤمن به المسلة" حط الانتماء للدين .
من وجهة نظري الماركيتريه :) ان الاعلان دا ناجح بكل
المقايس كإعلان ، وفعليا يجبر المستخدم للضغط علي الاعلان ودا من خلال انه لفت
انتباهك بوجود صورة شخص في الاعلان، ووجه عينك للون المميز اللي تحت، واجبرك
تضغط علي الاعلان علشان الانتماء الديني ، بجد برافوا للي صمم الاعلان.
نيجي بقي لاستهداف الاعلان وتحليل هل الاعلان نجح في
استهداف الشريحه اللي هو عايزها فعليا ولا لاء
كنت انا قولت اني شوفت الاعلان دا في موقع اجنبي مع اني
موجود في مصر، طيب دا ليه ؟
الاعلان دا معمول عن طريق
الاعلان في جوجل ادوردز ، واللي عامل الاعلان استهدف انه يظهر للمصرين، اي كان بقي
وجودي علي موقع اسرائيلي حتي، مش هتفرق بقي انا علي اي موقع عربي او اجنبي المهم
اني مصري، ودا الجزء الاول في الاستهداف وبطبيعة الحال في برنامج جوجل ادورز
الاستهداف دا ناجح مش مستاهل كلام كتير يعني.
تاني جزء في الاستهداف هل هو
مستهدف ذكور ولا اناث ولا الاتنين مع بعض ؟
بغض النظر عن الـ landing page اللي ودانا ليها الاعلان،
الاستهداف الواضح اوي من الاعلان انه بيستهدف المرأة بنسبة اكبر من
استهدافة للرجال ، لكنه من وجهة نظري غلط غلطة بسيطة اوي في الاعلان دا وهو إختيار
اللون اللي تحت في الاعلان، واللون دا اللي هو ممكن نقول عليه سماوي، نسبة الاهتمام
بيه بتبقي اكتر للرجاله، يعني يجذب الرجال بنسبة اكبر من النساء ودي غلطة صغيرة
اوي لكنها تفرق كتير اوي مع اللي عامل الاعلان، واستهدافه ، لانه هو كدا هيلاقي
نسبة الضغط علي الاعلان كبيرة، لكن في النهاية نسبة كبيرة منها مش هي الشريحة
المستهدفة بالنسباله، فبالتالي هو هنا دفع فلوس ع الفاضي.
ودا تحليلي اللي علي قدي للاعلان
لو انت عندك راي تاني ياريت متبخلش علينا بيه
وكلنا بنتعلم من بعض